Wanamichezo wa Baraza la Taifa la Hifadhi na Usimamizi wa Mazingira (NEMC) wamefanya usafi katika viwanja vya Usagara jijini Tanga mara baada ya ufunguzi wa Michezo ya SHIMMUTA leo Novemba 18,2024 yenye kauli mbiu isemayo "𝑼𝒘𝒂𝒋𝒊𝒃𝒊𝒌𝒂𝒋𝒊: 𝑾𝒂𝒏𝒂𝒎𝒊𝒄𝒉𝒆𝒛𝒐 𝑻𝒖𝒔𝒉𝒊𝒓𝒊𝒌𝒊 𝑼𝒄𝒉𝒂𝒈𝒖𝒛𝒊 𝒘𝒂 𝑺𝒆𝒓𝒊𝒌𝒂𝒍𝒊 𝒛𝒂 𝑴𝒊𝒕𝒂𝒂 2024 𝑲𝒘𝒂 𝑼𝒐𝒏𝒈𝒐𝒛𝒊 𝑩𝒐𝒓𝒂 𝒏𝒂 𝑴𝒂𝒆𝒏𝒅𝒆𝒍𝒆𝒐 𝒚𝒂 𝑻𝒂𝒊𝒇𝒂".

NEMC wamefanya hivyo ikiwa ni sehemu ya kutekeleza majukumu yake ya uhamasishaji wa kutunza Mazingira kama Taasisi pekee iliyopewa jukumu la Hifadhi na Usimamizi wa Mazingira nchini kupitia Sheria ya Usimamizi wa Mazingira ya Mwaka 2004.

Awali wakiwasili kwenye viwanja vya Usagara Wanamichezo hao wa NEMC walisambaza vifaa vya kuwekea taka kwenye viwanja hivyo pamoja na kuwakumbusha wanamichezo wengine umuhimu wa kutotupa taka hovyo na mara baada ya ufunguzi wakaingia uwanjani kuokota taka na kuweka kwenye vifaa hivyo vya kutunzia taka.

NEMC inashiriki mashindano ya Michezo ya SHIMMUTA inayofanyika jijini Tanga kuanzia Novemba 10 hadi 24,2024 ambayo yamefunguliwa rasmi Novemba 18,2024 na Naibu Waziri Mkuu wa Jamhuri ya Muungano wa Tanzania Mhe. Dkt. Dotto Biteko kwa niaba ya Makamu wa Rais wa Jamhuri ya Muungano wa Tanzania Mhe. Dkt. Philip Mpango.